Escondida entre as árbores, no medio dos carballos había unha casa antiga de pedra xusto detrás da adega Señorío de Rubiós (D.O. Rías Baixas). Unha casa con encanto, con historia e con ganas de darse a coñecer. Esa casa é hoxe a base do noso hotel, o edificio principal das nosas instalacións, pero tamén é o pilar sobre o que xira un novo proxecto da adega Señorío de Rubiós.

A adega, que naceu no ano 2005 froito do traballo e esforzo dun grupo de persoas de O Condado do Tea, foi sempre diferente, remando a contracorrente coa elaboración dos seus tintos dentro dunha D.O. predominante de brancos, de albariño.

Na actualidade elabora brancos, tintos e espumosos, todos eles dentro de Rías Baixas e cunha filosofía baseada na recuperación de variedades e viños tradicionais, os que mellor expresan as características e a esencia destas terras do Condado do Tea.

E con ganas de seguir mostrando estas terras, estas paisaxes, de potenciar esta comarca de O Condado do Tea, que tantas cousas ten para ofrecer, naceu a idea de converter a antiga casa nun hotel e marcar así o inicio dun proxecto enoturístico onde a natureza é a gran protagonista.